முத்தம்

மழை நாளில் ஒரு சமயம் தேநீர் இதழ்களாய் வந்தாய்..
சுவாச சூடு பரப்பிகொண்டிருந்ததை மெல்ல கைகளில் ஏந்தி பருக துவங்கினேன்..
சட்டென சுட்டதாய் விலகி சென்றாய்..
கை தவறி உடைந்த தேநீர்க் கோப்பையாய் சிதறி போனது முத்தம்..

பொறுக்கி

தீண்டினால், "ச்சீ ... போடா பொறுக்கி" என்று  தள்ளி விடுகிறாய்.

சரி என்று  பேசாமல் தள்ளி நின்றாலும் முறைக்கிறாய். . 

எதுகை மோனை

எதுகை மோனை சரியில்லையெனினும் அழகுதான்
உன் தெத்துப்பல்.

பாட்டி சொல்லாத கதை.

தப்பு பண்ணினா சாமி கண்ண குத்தும்
என சொல்லி கொடுத்த பாட்டி
காதலித்தால், தேவதை
மனசை குத்தும் என சொல்லிகொடுக்கவில்லை.

சாப்பிட்டியா?

எப்படி பசிப்பது அலுத்துப் போகவில்லையோ
அதுபோல்தான் "சாப்பிட்டியா?"  என
 தினமும் நீ கேட்பதும் அலுத்துப்போவதில்லை.. 

நீ - நான்

உன் பெருவெளியின் சிறுதுளி நான்
என் சிறுதுளியின் பெருவெளி நீ 

நீ

கதவை உடைத்து உள்ளே வந்து  களவாடுபவனைக் கேள்விபட்டிருக்கிறேன்.
மொத்தமாய் களவாடிவிட்டு பின்னர் உள்ளே வந்து என்னை
கன்னா  பின்னாவென்று உடைக்கிறாயே
உன்னை யாரென்று சொல்ல?

உலகம் பெரிதுதான்.
இன்னும் என்னால்
உன்னை கடக்க முடியவில்லை. 

வேண்டுதல்

உன் வேண்டுதல்களில்
நான் யாகமாகிறேன்.

முத்தம்.

உன்னுடனான  சண்டைகளில்
நான் வெல்லும்  பரிசுகள்
கடி,
கிள்ளல்,
நகக்கீறல்
இறுதியாய் நிச்சய பரிசாக முத்தம். 

பிரிவு

ஒவ்வொரு நாளும் உனை காணும் வரை
எனை சுட்டுக்கொண்டேயிருக்கும்
முன்தினம் கடைசியாய் பார்த்த பொழுது
"டேய்... போகனுமா?" என்று 
நீ என்மேல் சிந்திய கண்ணீர்த்துளி...

நீ

காற்றையும் உருக்கத் தெரிந்தவள்
நீயாகத்தான் இருப்பாய்.
     
            *****

என் ஈற்றடி
உன் இதழடி.

முத்தம்

மூச்சிரைக்கும் நம் பேருரையின்
கடைசி புள்ளியாய்
இந்த முத்தம்... 

பூ

இதுவரை பூத்த பூக்களையும்
இனிமேல் பூக்க போகும் பூக்களையும்
ஒன்றாய் சேர்த்தால்கூட உன் போல் வராது..

பொறாமை

எப்படியெல்லாம் அந்த குழந்தையை கொஞ்சுகிறாய்
என்னை கிள்ளியாவது வையேன்... 

மறுபிறவி

"உன்னை கொல்ல போறேன் பாரு"

என்று என்னை கிள்ளி கிள்ளி 

சண்டையிட்டு உயிர்பிக்கிறாய்..

முத்தங்களால் சாகடித்து

 ஸ்பரிசங்களால் உயிர்பிக்கிறாய்..

முத்தம்

இதுதான் கடைசி கைப்பிடி சோறு என்று சொல்லி
குழந்தையை சாப்பிடவைப்பதுபோல
உன்னிடம் ஒவ்வொரு முறையும்
இதுதான் கடைசி முத்தம்
என சொல்ல வேண்டியதாகிறது.. 

முத்தம்

எனக்கும் நிறுத்திக்கொள்ள ஆசைதான்
ஆனால்  எவ்வளவு கொடுத்தும்
உன் கன்னங்கள்தான் நிரம்ப மறுக்கிறது
என் முத்தங்களால்..

கவிதை

உன் உதட்டு வெடிப்பு
கவிதைக் கீறல்..

காதல்

உன்னை பார்க்கும் போது
உள்ளேயே இரு என்று மிரட்டி பார்க்கிறேன்..
நீ இல்லாத போது ச்சீ தள்ளி போ என விரட்டி பார்க்கிறேன்

ம்ம்..ம்.. இந்த காதல் கேட்க மாட்டேன்கிறதே..

நதி

நதியின் அலையாய் நான்..
நீ அள்ளினாய், உன் கடலில் மூழ்கினேன்..